Rom 6 | BEF | STEP | Yana'mu lali hena ka lilune? Hu'mau lele'mo bati hu'ehinaya lali foipana liba liba hulenogo ai'a lehe'mose'na'auba mone hiti huto hu letalina'mu yabe luto ya lilupi?

Romans 6

Yesutoga lali huto nohune

1 Yana'mu lali hena ka lilune? Hu'mau lele'mo bati hu'ehinaya lali foipana liba liba hulenogo ai'a lehe'mose'na'auba mone hiti huto hu letalina'mu yabe luto ya lilupi? 2 O'e, ya huto meni'ibe. Lali foipana'mu fililata suhi huto foipana lisemofihi ahe'mi su ho'ohune. Henabe luto aku foipana liba liba huto minalune? 3 Menokehelipi? Lali nagami'i folo'ohuto Yesu Kilisito hiti lali moneko babeyafa hu'ohune. Yesu ai'a fili'ehinamu'i lali hiti moneko babeyafa suhi huto hu'ohuta yabe. 4 To Yesu Kilisito fililago keli he'ahana suhi luto moneko'na hilune luto nagami'i folo'ohune. To ana huto afotifihi hetofa amuya'auba Kilisitohi fili'ehinagati le'mo ho ti'ehina supo huto lali yuhufa hapati huto minalune luto nagami'i folo'ohune. Nagami'i folose hapa'a ya huto ni'ibe.

5 Ai fili'ehinaya lali ana huto fililuta nohunogo aitoga hepito minalune. Hu'mau ai'i fili'ehinagati le'mo ho ti'ehinamo ni'igo lali ana huto fili'ohunagati lele'mo ho ti'ehina suhi mino kosaba huto aitoga hepito moneko babeyafa hilune'mu nohune. 6 Koyapa'i hapati Kilisito hiti malipu yafalo fili'ehina ya'ma lali akeheli'ohune. Hena'mugope foipanauba lugufagu foya nolinamofihi amuya'a su ho letalibe. Ya hulenogo lali foipanamofihi kele kele yagapana'a aku'i meminaluta'mu yabe. 7 Bo mone fililenogo foipa hapa'amofihi amuya molo'ehina ya'ma asu halina'mu yabe. 8 Lali Kilisito hiti fili'ohuta keheli'ohune. To lali ana huto ho tito ai hiti minaluta keheli ule'ale hulata nohune. 9 Lali mana keheli'ohune. Yesu fili'ehinagati ho tito aku mone'a hiti mefililina'mu yabe. Filise'nauba aitoga amuya memolo'ehina to be meligilina'mu yabe. 10 Ai foipanamofi kumu amuya'a li he'milube luto moneko yupahi fili'ehinauba su ho'ehibe. To yatai ai Hu'mamofihi hiti hepito mino kosaba huto nominobe. 11 Ya'mana suhi lite lenalitini afili'ohune lite lilanauba foipanamofihi kele kele hu meminalana'mu yabe. Lenali Yesu Kilisito hiti hepite minete Hu'mamofihi mino kosaba huse'na limi'ehinalo minaluna'mu yabe.

12 Ya hinogo foipana liseuba lenali lenugufatinimofihi kaba hu meepalalina ya'mana lenugufagu laga lepesilata nohinamofihi mege'i memalalo. 13 To lenali lenugufatini mone kegi'a foipana lili'nalo memalalo. Ma'naka, lenali asaga komopatini hiti lenekesa yigise'na Hu'mamofitogago molo emilenogo foipanamofihi fili'ahanagati ho ti kosaba hite minalana suhi huto yabe. Asaga lenugufatini komopatini Hu'mamofitogago eminogo ai lili'na'a hetofanamofihi li huto hilibe. 14 Lenali akeheli'ahabe. Foipanauba lenali kaba botini aku meminalibe. Hena'mugope yatai lenali keya kamofihi mege'i melete menehabe. Lenali Hu'mamofihi lenehe'mose'nauba yatai kaba hu lepalago nehabe.

Hetofa lili'namofihi koko pana'a

15 Henati hilune? Lali keya kalo memino'ohuta Hu'mamofihi lehe'mose'nalo nohuto fa'mene foipa faipana liluta ni'ifihe? Ya huto meni'ibe. 16 Lenali mekeheli'ahafihe? Bo mone'mofihi lenali lenugufatini emilete baga liyafa hilana lenali koko pana'a lolo hite minalabe. Lenali foipanamofihi koko pana'a minelete ananalo filisemofihi lilana'a huto ni'ibe. To lenali ya mehitemo ka lamana'a mege'i molosemofihi koko pana'a minelete yanaloti mino bebe sosemofihi hapa'a lilana to Hu'mamofihi gobisalo minalabe. 17 Koyapa'i lenali foipanamofihi koko pana'a mine'ahanaya to yatai Hu'mamofihi hetofa kapa lu lenelepi'ehinanamu'i kehelite ana kaga ma'naka luto mege'i melelata nehabe. Yana'mu Hu'mamofitoga lofokehi nolune. 18 Hu'mau foipana nagaluguti gulu fo lepolo'ehinago lenali bebe sosemofihi koko pana'a lolo hi'ahana yabe. 19 Lenali komopatini lapa mebi'ehigo keheli bati mehi'ahanamo ni'inagi nani lu hokolo huto huto kaga lu lepi'ohuna. Koyapa'i lenali kolo tana hapatinimofihi lenugufatiniuba koko pana'a lolo hulago keya ka pelesa ite foipana babu lite li'ahana. Ana suhi lite lenali yatai lenugufa luga'atu hetofa lili'na lisemofihi eminogo koko pana'a lolo hite minenogo aliha'a lamana bona'i huto hilabe.

p 20 Koyapa'i lenali foipanamofihi koko pana'a minelago ya'mana kana'alo hetofanauba kaba mehu lepolo'ehina, fa'mene mine'ahana yabe. 21 Koyapa'i ya hite foipana li'ahanalo yatai lenubuya nohibe. To ya'ma hi'ahananauba lenele'mo bati hu'ehifihe? O'e. Ananauba lenele'mo sibina hu'ehinaya to filise kapolo lenele'mo malalibe. 22 Yatai Hu'mau foipanamofihi naga'i gulu ho lepoloto ai'a koko pana'a lenele'mo lolo hu'ehina. Ya higo legeya'a ya'ma ni'ibe. Lenali lenemehatini aitoga emite minelete alihi mino kosaba huse hepato tito minoba minoba hite minalabe. 23 Foipanauba ai'a koko pana'magihi lili'nalo nona'a epilata nohinaya filise'na yabe. To Hu'mau fa'mene limilinamofihi ya mino kosaba huse'i ni'ibe. Ya'manamofihi Sipi Boti Yesu Kilisito hiti lele'mo hepito moneko'na liluta'mu yabe.